Naagyahay awow iyo awow iyo abkaan sheegto

Iyo anigu abidkay ma arag iibsi lacageede

Aqdaan buu lahaan jirey raggaan ka isirraa waaye

Ol'olaan wax kaga qaybsan jirey ululuf duullaane

Maruun baan umaamaday waxaan aabbahay faline

Afar waxaan u dhaxay tuuladii awrta loo raraye

Albaabki Burcaan tegay anoo aaladii sida e

Amminkiiba lay yimid sidii eegi lay yahaye

Ooggii horay nagu kaceen adhi dillaalkiiye

Dar imaanka laga qaaday baa noo aloogsadaye

Amankaagay goortay wankii araxda tuujeene

Intaa weeye iyo ma ahadii la is-ilaaqaayey

Asaraartankii baa qalbiga aad wax ii dhimaye

Il maroojihii bay khatalay kii aan aaminaye

Afar bawlad laga gooyey bay igu asluubeene

Anigoo arkaayaa gamcaha laygu iibsadaye

Adhigaad i weydiinaysaan uun kalow baxaye

Kuwo boqonta ood laga sudhay ila ahaayeene

Ushaa jeedal iyo suufaf bay igu illaaweene

Ascaartaba rag bayga badshee idinku weydiiya