ما عملش حاجة تستحق الذكر
ما عملش حاجة تستحق الذكر
موظف عادي في هيئة حكومية
إجمالي ما يحصل عليه
ألف تلتمية وحاجة جنيه
لا يعول
وغير مسؤول إلا عن نفسه
لا يبوح للأصدقاء العابرين عن أمله أو يأسه
كان عادي جدًا مضمونًا وشكل
مش شرير ومش طيب
مش موهوب ومش غبي
مش مجذوب ومش نبي
ولا حتى عاش قصة كفاح ع اللقمة في بلد أجنبي
تلهم بتوع السيما يحوّلوها لفيلم
أو حتى يوحش حد ساعة الأكل
م النوع اللي تستغرب لو جه لحد في حلم
بس النهارده في المنام جالي
واقف على الشعرة اللي بين الوجود والعدم
فاتح عينيه
ماشي ف شارعهم المليان تراب
خطاويه ما بتعلّمش ورا منه
وكأنه من غير قدم.. ع الأرض وكأنه
كان ماشي بس الزمن هو اللي ما بيمشيش
كان ماشي واحنا متسمّرين حواليه
لحد ما بلعه الضباب بشويش
يشبه بطل أسطوري وخيالي
ما عملش حاجة تستحق الذكر
غير إنه واقف لسه على رجليه